حلمك

حلمك القلتيهو لي صار معلق في خيالي

قصة العشاء و الشموع لبسك الثوب المثالي 

لمعة الحب الكبير ظاهره في عيونك تلالي

 لون لهب شمع الأماسي وفي عيونك انعكاسي

صوتك الرنان يدوزن لي صباح يوما جديد لي كاسي 

تطلع الكلمات حروفها في فؤادي تكون مراسي 

اسرق النظرات تجاهك و ابتسم و تضحك حواسي

حلمك القلتيهو لي ده الكلام الكنت داسي 

و لِسَّه عندي انا ليك غيرو حاسي ...الا داسي 

كنت بحلم بيك معاي و في حياتي تكوني اُنسي

أتنفسك في كل دقيقة و بينا طفل الريدة يمشي 

حتي ان غابت عيوني لي ظروفي تكوني همسي

كنت بحلم بيك معاي و خطوة خطوة العمر نمشي

الا ضاع املي و رجاي و خاب كتير ظني و هواي

عشت بعدك عمر قاسي و نومي بي أنات  ملاذي

اكثر من أحببتك

يوما ما ستعلم اني اكثر من أحببتك 

وًانا انا اكثر من كان بقربك و قد حذرتك 

و ستعرف انك من دوني لا شي و اني كنتك

و ستدرك يوما ما اني موجود و ان ابعدتك

٢٥ ديسمبر

الليلة عيد ميلادو

كل سنة وأنت طيب..
كنت ببارك ليك مباشرة طول السنوات الماضية لكن السنة دي مافي طريقة ...

كل سنة وأنتي زي ماعايزة تبقي
و كل أحلامك حقيقة .. معاكي طفل الريدة يمشي
و تبقي احسن كل يوم و ما تعرفي للهموم
و ليك يصبح كونا اجمل و بي وجودك يبقي أفضل

- زول كان قريب منك .. 

روحي ألفي لقاك

روحي الفي لقاك

روحي الفي لقاك طمعت و زاد تأميله

قنعت من هواك و عرفت لقاك مو هيله

يا ست البنات الكنتي لي خليله 

ما في قسمتي ... ودع هواك الليلة

ودعت السمح العمرو ما غلطني 

ودعت الجميل السيسبان المتني

ودعت النديم النفسه زي الجني

ودعت الحبيب اليه بكتب اغني

ودعتك خلاص فارق هواك الليلة 

يا السمحة ام قوام تشبه جدي الريلة

يا ام العيون الينا كنتي  قبيلة

ما بنصبر وراك و الجرسة فيكي قليلة

لو ...

الزول لو بريدك ما بختي دربك اصلو 

و ان كان حب حقيقي السيف ما بفصلو 

الا الفات بلاك خلاك ليالي تنظروا 

ما كان ليك بريد بركة الختاك و افتحلوا

أنساك

بقدر أنساك و أفوت دربك

و لا يمكن في  يوم ارجع ليك 

يا الدخلت سواي في قلبك 

اعرف أنى  ما بغفر ليك 

تجارة الريد

تجارة الريد خطيرة  و ياما فيها مصاعب

بيع الريد عجيب و مافيهو شيتن صائب

كل العارضينو  تجار الغرام ما بطايب

ان خِتتك الحظوظ و الله تبقي مصايب